ഗാന്ധിനഗര്‍: വഴിയരികില്‍ യുവാവിനെ തടഞ്ഞുനിര്‍ത്തി പണം കവര്‍ന്ന കേസില്‍ യുവാവ് അറസ്റ്റിൽ. ആര്‍പ്പൂക്കര വില്ലൂന്നി തെക്കേപ്പുരക്കല്‍ മേയ്‌മോനെ(41)യാണ് അറസ്റ്റ് ചെയ്തത്. ഗാന്ധിനഗര്‍ പൊലീസ് ആണ് ഇയാളെ അറസ്റ്റ് ചെയ്തത്.
കഴിഞ്ഞദിവസം രാത്രി എട്ടിനു മെഡിക്കല്‍ കോളജ് ആശുപത്രിക്ക് സമീപമുള്ള ബസ്‌കാത്തിരിപ്പ് കേന്ദ്രത്തില്‍നിന്ന അതിരമ്പുഴ സ്വദേശിയായ യുവാവിനെ ബൈക്കിലെത്തിയ മേയ്മോനും സുഹൃത്തും ചേര്‍ന്ന് ഉപദ്രവിച്ച് യുവാവിന്‍റെ പാന്‍റിന്‍റെ പോക്കറ്റില്‍ സൂക്ഷിച്ചിരുന്ന 24,800 രൂപ ബലമായി തട്ടിയെടുക്കുകയായിരുന്നു.
പരാതിയുടെ അടിസ്ഥാനത്തിൽ ഗാന്ധിനഗര്‍ പൊലീസ് കേസ് രജിസ്റ്റര്‍ ചെയ്യുകയും പ്രതികളിലൊരാളായ മേയ്മാനെ പിടികൂടുകയുമായിരുന്നു. ഇയാള്‍ക്കെതിരെ ഗാന്ധിനഗര്‍ സ്റ്റേഷനില്‍ വധശ്രമം ഉള്‍പ്പെടെ നിരവധി ക്രിമിനല്‍ കേസുകളുണ്ട്. മറ്റ് പ്രതിക്കായുള്ള തെരച്ചില്‍ ശക്തമാക്കിയതായി പൊലീസ് പറഞ്ഞു. പ്രതിയെ കോടതിയിൽ ഹാജരാക്കി.
